من كام يوم بتدور فى دماغى فكرة مش عارف أكتبها.
النهاردة لقيت صورة بتقولها أوى.
ولأنى مش هاعرف أكتبها زى الصورة أنا هاسيب لكم الصورة وهى تقول.
يا ترى إيه الشيء اللى مش منطقى فى الصورة؟
بيتهيألى واضحة أوى.
أنه مينفعش كلنا نبقى الراجل بتاع الأسانسير لأن كل واحد وليه شغله وبتاع الأسانسير شغلته الأسانسير يمكن تبان شغلانة سهلة وبسيطه عادى يعنى ندوس على الزرار نطلع وندوس تانى ننزل. بس الحكاية مش سهلة أوى كده.
وكمان فى حاجة مهمة لما كلنا نبقى بتاع الأسانسير ونطلَع وننزل فى الناس براحتنا يبقى الناس اللى مش بتعمل نفسها بتاعة الأسانسير مش هيلاقوا مكان يركبوا فيه وكمان هنلاقى كل واحد عامل نفسه بتاع أسانسير بيدوس على زرار غير اللى بيدوس عليه واحد تانى برضه عامل نفسه بتاع أسانسير يقوم الأسانسير يعطل بينا كلنا ولا إيه؟
لو أنت مش بتاع الأسانسير يبقى أركب وأستنى بتاع الأسانسير يشوف شغله علشان فيه بلاوى كتييير أوى كان السبب فيها واحد عامل نفسه بتاع الأسانسير.
وبس.
3 comments:
تعرف موضوع ان الصوره تساعد الكاتب و تلهمه بأفكار حصلتلي قبل كده و أعتقد بيبقى شئ رائع جداً و كأنك أخيره وجدت اللي كنت بتدور علي
بالنسبه لبتاع الأسانسير عندك حق فعلاً ناس كتير بتاخد أدوار بعض و بينسوا أدوارهم الأساسيه و لو كلنا بقينا بتوع الأسانسير محدش هيركب
أحييك على الفكره
تحياتي و احترامي ليك
السلام عليكم ورحمة الله
العين هى مفتاح الوصول الى الروح
فدائما ما تلهمنا الرؤية والصورة باشياء كثيرة ومعانى رائعة
احنا فى بلاد كل واحد فيها بيتصور ان له حق فى كل الادوار خاصة لو ربنا اعطاه بعض التمكين من مال وقوة ونفوذ
فليرحمنا الله ويارب كل واحد يلزم حده ( اقصد دوره ) لكن انت ذكرتنى بالمثل بتاع فرعون ( قالوا لفرعون ايه فرعنك ...... ) احنا اللى بنتنازل عن ادوارنا لغيرنا خاصة لو ما يستحقها بتكون هنا المصيبة
فليرحمنا الله
تحياتى لك ولا سقاطاتك الرائعة
دمت بخير
@ شيرين سامى
أكيد حاجات كتير بتساعد على الكتاب ممكن صورة وممكن جملة
تعرفى أنى أكتر الحاجات اللى باكتبها بتكون جملة رنت فى دماغى وأبتدى أشتغل عليها لحد لما تكمل :)
نورتينى
@ أم هريرة
العين مفتاح الوصول للروح
عجبتنى الجملة جداً
والله مش دايماً إحنا اللى بنتنازل عن أدوارنا بس هو طبعنا كده أن كل واحد عارف فى كل حاجه وفاهم فى كله وممكن يعمل أى حاجة "إلا من رحم ربى"
أشكرك على متابعتك وتعليقك
تقبلى تحياتى
Post a Comment