Friday, December 24, 2010

كراسة الواجب - 2



حل الواجب المحول من العزيزة دكتور/ ولاء صلاح صاحبة مدونة دمعة حنين


الواجب عبارة عن مجموعة من الأسئلة مطلوب الإجابة عنها


تعريف مختصر بالمدون


الأسم: الحسينى أحمد


السن: 28 سنة


الحالة الإجتماعية: أعزب


المهنة : مراجع "مدقق حسابات"


مقيم حالياً بالرياض


المكانة العلمية والدراسية التى وصل إليها المدون والتى من خلالها يستطيع أن يقدم خدماته للمجتمع.


حاصل على بكالوريوس التجارة جامعة عين شمس مسجل بسجل المحاسبين والمراجعين المصرى "شركات أشخاص" وباستعد بإذن الله لامتحانات جمعية المحاسبين والمراجعين المصرية.


سبق لى التسجيل فى دبلوم المراجعة جامعة عين شمس ولكن تركته لأنه فى وقتها لم يمثل لى أى إضافة عن الحشو المعتاد أثناء الدراسة الجامعية


البداية فى التدوين "تاريخ"


أول تدوينة لى كانت بتاريخ 15 نوفمبر 2006 "باللغة الانجليزية"


أول تدوينة بالعربية 26 سبتمبر 2010


كيف كانت البداية فى التدوين؟


فى البداية سمعت عن المدونات وعن إمكانية إنشاء مدونة خاصة تنشر عليها كلامك أو أراءك أو كتاباتك وأنشأت مدونتى لنشر بعض النصوص اللى كتبتها باللغة الأنجليزية للتدرب على الصياغة باللغة الأنجليزية ولكن منشرتش أكثر من نصين :) بعدها أهملت المدونة تماماً وكنت باكتب "notes" بالعربى وبانشرها على حسابى فى الفيس بوك لأنها وسيلة سهلة ولأنى نسيت المدونة تماماً.


بعدها أصبحت أتابع عدد من المدونات خلال تصفحى للأنترنت وأعجبتنى بعض المدونات وقررت أرجع للمدونة وأنشر عليها اللى باكتبه خصوصاً أنى كان عندى حاجات كاتبها على الكمبيوتر ومنشرتهاش قبل كده على الفيس بوك.


ليه أنا مدون؟


أمممم أنا مدون لأنى باحب الكتابة معنديش سبب تانى غير أنى باحب أكتب وعلشان كده باكتب وباكتب اللى بيخطر على بالى وبس وبراعى فى اللى باكتبه أنه يكون كلام محترم ومناسب طالما أنه متاح لناس تانية تطلع عليه.


ما هى طموحاتك فى التدوين؟


ولا حاجه لأنى باكتب علشان أحكى مع نفسى وعاوز أحكى مع نفسى على قد ما أقدر وبس.


بس لأنى دايماً أصاب بالملل بسرعة نفسى ميتحولش الملل ده لملل من التدوين.


ونفسى لما أكتب يكون كلامى مفيد للناس وممتع مش تضييع وقت .


أكتب عن شيء تحبه.


وجودى وسط أهلى وأصحابى.


الزرع , الصحراء, البحر وكل المناظر الطبيعية.


الأطفال , الطيور والحيوانات خصوصاً الصغيرة زى القطط الصغيرة .


القراءة , الكتابة, الرسم.


أفلام الكارتون, الخروج والتمشيه لوحدى فى أى مكان.


باحب خان الخليلى والحسين والغورية ووسط البلد.

منظر الشوارع النظيفة المرتبة الهادية.

الجو الحلو فى أى فصل من فصول السنة.


حاجات كتيييير :)


واجب تانى


من أرسل لك الدعوة؟


دكتور/ ولاء صلاح صاحبة مدونة دمعة حنين.


المواقع المفضلة التى تزورها باستمرار مع رابطها والأستفادة منها.


موقع الويكيبديا عربى أو إنجليزى أى معلومة محتاجها تقريباً بالاقيها هناك.

موقع جوجل طبعاً غنى عن التعريف.

مواقع تحميل الكتب المجانية مش حاجة محددة بابحث باسم الكتاب ولو لقيته فى موقع كويس وسهل عادة باسجلة فى المفضلة عندى.

وطبعاً المدونات اللى بتابعها وبعض الصحف المصرية ومواقع الأخبار زى ال بى بى سى العربى .

6 comments:

Dr/ walaa salah said...

عشره على عشره يا الحسيني

مشكور لتلبية الدعوه

استغربت اوي لما قلت انك بتحب الصحراء

غريبه انا الصحراء بالنسبه ليا شئ جاف قاسي الظروف

ازاي الانسان يحبه

ربنا يوفقك في امتحانات جمعية المحاسبين والمراجعين المصرية.

اول مره اسمع عن الجمعية دي ^-^


على العموم عشره على عشره يا الحسيني

بالتوفيق

Unknown said...

مبسوطه اني اتعرفت عليك أكتر و واضح انك انسان بسيط و واضح و مشاعرك رقيقه لأنك بتحب الطبيعه و الهدوء
عحبني أوي انك بتحب أحياء مصر القديمه
لكن انت مش عارف قيمة كتاباتك أعتقد انك قاص هايل ربنا يوفقك
تحياتي الشديده لأخي العزيز

الحسينى said...

@ dr/ walaa salah
الشكر لكِ لأنك أفتكرتينى بتمرير الواجب
وأنا باحب الصحرا لما تكون فيها تكوينات زى الجبال والصخور بألوان مختلفة وكمان الصحراء مكان هادى جداً وده أحلى حاجه فيها.
متشكر على دعواتك ليا, وجمعية المحاسبين والمراجعين هى حاجه كده زى زمالة مصرية لمدققى الحسابات ولو نجحت فى الامتحانات بتاعتها هتختصر لى خمس سنين من المشوار العملى بتاعى ده غير أنها معترف بيها عربياً ومطلوبة جداً وكمان عالمياً لما أنجح فى امتحاناتها بتدينى إعفاء من بعض مواد الزمالة البريطانية لو حبيت أدرسها.
مشكورة على زيارتك وعلى متابعتك الدائمة.

الحسينى said...

@ شيرين سامى
مصر القديمة مكان يخليكى تنسى الدنيا واللى فيها :)
متشكر على دعواتك وكلامك الكبييير أوى اللى طبعاً على واحد تانى مش عليا :))
ردودك وتعليقاتك على تدويناتى بتخلينى عاوز أنشر تدوينة جديدة علشان اشوف تعليقك متشكر على ذوقك وأخلاقك العالية وأنك تعتبرينى أخ ده يشرفنى
تقبلى تحياتى

WhItE HeArT said...

حلو الكلام

ربنا يوفقك في حياتك

تحياتي

الحسينى said...

@ white heart
شكراً لمرورك وتعليقك ودعواتك
تقبل تحياتى