Friday, December 3, 2010

كراسة الواجب




السلام عليكم ورحمة الله وبركاته


أولاً أنا هاكتب التدوينة دى بالعامية علشان مش راكبة معايا غير كده J


ثانياً التدوينة دى هى حل الواجب المحول من العزيزة شيرين سامى صاحبة مدونة حدوتة مصرية


الواجب عبارة عن سؤالين


الأول هل أنا فضولي و بحب أتدخل في شئون الآخرين؟


بصراحة لأ لسبب بسيط أنى مش باحب حد يتدخل فى أى حاجه شخصية بالنسبة لى والفضول صفة وحشة أوى لما تعنى التطفل على الناس وأنك تفرض نفسك عليهم بدون مناسبة والنتيجة الطبيعية أنى مش باسأل على أى حاجة شخصية إلا لو الشخص صاحب الموضوع هو اللى ابتدى يتكلم فيها وبرضه لما يكون بيحكى مش باقاطعه عشان أعرف تفاصيل التفاصيل الجانبيه للموضوع اللى ممكن تكون تفاصيل شخصية حتى لو هو اللى كان بيحكى لكن برضه هو يقول اللى هو عاوز يقول عليه وخلاص حتى مع أصحابى القريبين جداً.


على النقيض تماااااااماً فى البيت حشرى جداً لأقصى درجة متطفل أكتر من كائن أميبا طفيلى اللى كنا بنسمع عنه فى تالته أول فضولى وباحب أعرف كل حاجه J ودى عادة عندى أنا وأخواتى مع بعض ومتعودين عليها.


الثانى ما هي الأسئله التي تستفزني؟


نتفق على قاعدة مهمة وهى أن كل سؤال من عينة أنت نمت؟ أنت لسه صاحى؟ أنت جيت؟ أنت نازل ؟ كلها أسئلة تفقد معنى السؤال لأنى أكيد صاحى طالما أنت شايفنى لسه صاحى أو أنا قدامك يبقى أنا جيت أو أنا لبست هدومى ومتجه للباب يبقى أنا نازل فكل الأسئلة دى فقدت المعنى بتاعها لأن اجابتها قدام اللى بيسأل وعشان كده بتبقى مستفزة أوى.


هترجع امتى؟ مش عارف فبلاش السؤال ده خصوصاً لو خارج مع اصحابى مش بنقعد باستوب ووتش يعنى هنرجع لما نقول ياللا كفاية كده يعنى مفيش مواعيد محددة.


هتاكل ايه النهاردة؟ رغم أن ماما ربنا يديها الصحة بتسأل كل كائن موجود فى البيت السؤال ده لكن عمرها ما بتاخد إجابة مقنعه كل واحد بيقول الى موجود أو اللى هتعمليه أنا بتضايق من السؤال ده أوى ومش باحبه بصراحه محير جداً "نصيحة لأى واحدة مسئولة عن بيت أعملى أى حاجه وريحى دماغك واللى موجود هيتاكل"


صنف تانى من الأسئلة المستفزة زى ايه الجديد؟ لما تكلم حد على التليفون او تقابله ويسألك كل مره على الجديد حتى لو بتتكلموا كل يومين "لو فى جديد أكيد هتعرف ولو مفيش خلاص ممكن تقوللى أنت على الجديد بتاعك لو عاوز معنديش مشكلة"


بتقبض كام؟ بصراحة مش عارف الناس أزاى بتتجرأ وتسأل السؤال ده "سواق التاكسى بيسألنى راتبى كام تصدقوا دى؟"


لما يكون حد تعبان وييجى حد يسأل هو عنده ايه؟ بلاش تحط نفسك فى موقف محرج أو تحط الناس فى الموقف ده علشان ده شيء شخصى لو المرض تعدى الأنفلونزا ميصحش تستفسر عنه وتتدخل علشان تعرف تفاصيله.


أخيراً هتنزل أجازة أمتى؟ طبعاً للى ميعرفش أنا باشتغل بره مصر وأجازتى سنوية عادة, باتضايق قوى لما أكون مسافر بقالى شهر وأكلم حد يقوللى هتنزل أمتى ويتكرر السؤال ده فى كل مكالمة غير أنه سؤال مستفز فهو بيضايق كمان.


طولت عليكم معلش


أحب أشكر العزيزة شيرين وأتمنى يكون حل الواجب يستاهل نجمه J


كمان أحب أشكرها على تنويه بؤجة الخير الشتويه هى وكل المدونين اللى نشروا التنويه وأضم صوتى لصوتهم وأقول الدال على الخير كفاعله واللى مش هيشارك بالتبرع أو الحضور ممكن يشارك بتمرير التنويه يمكن يكون سبب لوصول مساعدة لحد محتاج ومتنسوش النية فى عمل الخير وانتم بتشاركوا أو حتى وانتم بتمرروا التنويه وده اللينك بتاع التنويه من بيت المدونين


http://bloggers-house.blogspot.com/2010/11/blog-post_24.html


لو أنا مضطر أمرر الواجب مش عارف أمرره لمين لأن تقريباً كل المدونين اللى باتابعهم أو بيتابعونى حلوا الواجب قبل كده


ممكن أمرره للأخ أشرف محيى الدين صاحب مدونة أفكار وتساؤلات


الأخ محمد جمعة صاحب مدونة يوميات إنسان


ولكل مدون يشوف التدوينة دى وميكونش حل الواجب ده قبل كده


تحياتى للجميع

3 comments:

Dr/ walaa salah said...

اجابات صريحه يا الحسيني

تاخد عشره على عشره لصراحتك

هتاكل ايه النهاردة؟

تصدق السؤال ده بيتسأل في كل بيت ويومياً

ومفيش فايده محدش بردوا بيستقر على حاجه

مشكور مره تانيه على صراحتك

محمد جمعه said...

الاسلام عليكم ورحمة الله
تحياتى ليك حسين وشكرا على تمرير الواجب وجارى الحل ,مع انى نسيت حل الواجب من زمان بس هاحاول

شيرين سامي said...

كده انت جدت الفوول مارك :)
اجاباتك جميله و تلقائيه واضح انك صريح و عجبني تطفلك في البيت لأنه صحي جداً و بيبقى جميل بين الاخوات
ربنا يخليلك أسرتك و بشكرك على التزامك بالواجب :))