Wednesday, April 20, 2011

تاج الثورة


تاج الثورة مررته لى شيرين سامى صاحبة مدونة حدوتة مصرية*
هل توقعت ثورة 25 يناير؟
طبعاً لا ولو كان حد حكى لى كل اللى حصل ده كنت قلت عليه فيلم هندى  بس الفترة اللى قبل 25 يناير ومع الدعوات بالخروج والفيديوهات حسيت أن الموضوع هيكون مختلف أو اتمنيت ده من جوايا لكن عمرى ما تخيلته بالشكل ده.
وفى يوم 14 يناير كتبت بوست سميته أضغاث أحلام وكنت باحلم فيه بتغيير الظلم لكن كان أمل بعيد زى أضغاث الاحلام.

* وهل كنت من ثوار ميدان ( التحرير - الكنبة - الكمبيوتر - حدد الميدان الآخر الخاص بك)؟
طبعاً أنا مقيم فى الرياض بحكم عملى فكنت من ثوار ميدان "الفيس بوك" :) أكيد كان نفسى أكون موجود فى مصر وقتها لكن الظروف مسمحتش لكن كنت باتابع الوضع زى كل المصريين المغتربين وايدينا على قلوبنا وقلقنا على مصر عموماً وعلى أهالينا وأوقات مكناش بننام لأننا بنسمع حاجات كتير ومفيش عندنا وسيلة نتأكد بيها من الأوضاع عاملة إزاى فى مصر وكانت من أصعب الفترات اللى مريت بيها.

* ما لم تنجح الثورة في تحقيقه هو:
أكيد صعب أقول الثورة منجحتش فى تحقيق إيه بعد شهرين من الثورة الموضوع محتاج وقت أكبر علشان نحكم على حاجه زى دى لكن بيزعلنى أن الثورة وهدفها موصلش للناس البسيطة اللى كانت متضايقة بجد " مش فلول يعنى ولا ثورة مضادة" من تعطيل الحياة لأن الناس دى مش فاهمة الفرق بين وجود مبارك أو عدمه ومش فاهمة أنه هو السبب فى تهميشها وفقرها وجهلها وكان نفسى غرض الثورة وهدفها يوصل لكل الناس البسيطة اللى مالهاش فى السياسة وتعرف أن الثورة دى عشان هما يعيشوا حياة أحسن بس إن شاء الله لما أوضاعهم تتحسن أكيد هيعرفوا ده.

* أكثر شىء فرحك في هذه الثورة هو:
أول حاجة حلوة كانت الفيديو بتاع الشباب المعتصمين اللى بينظفوا مكانهم فى الميدان الفيديو ده خلانى فى السما .
بعدها كل الايجابيات اللى ظهرت الناس بتتعاون والمسيحين بيحاوطوا المسلمين وهم بيصلوا والناس كلها بتتعامل مع بعض بمودة والناس بتحمى بعض من غير ما يعرفوا بعض وبيتشاركوا فى الاكل والشرب، وكله كوم بقى واللجان الشعبية كوم تانى دى كانت فاكهة الثورة :)
وكمان رأى الناس بره فى المصريين بعد الثورة ونظرات الاعجاب فى عيون الناس وهم بيتكلموا عن المصريين حتى من الأخوة العرب أو الاسيويين هنا فى المملكة وهم بيتكلموا معانا عن الثورة والشباب المصرى اللى بيعمل ثورة وينضف ورا ثورته تانى يوم.

* الشخصية التي أعجبتك خلال الثورة:
كل مصرى نزل الميدان ولو هاختار أشخاص محددة أنا حبيت نوارة نجم فى الوقت اللى قبل الثورة وبعد لما خدمة الانترنت رجعت ورجعت تدون تانى كلامها كان بيعجبنى وما زال.

* الشخصية التي احتقرتها بسبب الثورة:
هناء وشيرين قصدى هناء وسيد بتوع المحور .
فعلاً كانوا أزبل حاجة فى الوقت ده "وأسف طبعاً على اللفظ بس ده أقل واجب يعنى"
واللى زيهم طبعاً وعمتو عفاف شعيب برضه نزلت من نظرى جامد "حقد طبعاً علشان بتتعشى كل يوم بيتزا وريشه :)"

* أطرف ما سمعته خلال الثورة؟
فيديوهات ميدان التحرير طبعاً "مستر نانا" والولد بتاع الجامعة الامريكية اللى كان بيقول هنعمل إنقلاب وكلمة السر "شيت" واللافتات اللى الثوار كانوا بيرفعوها كان تقريباً كرنفال خفة دم.

* القناة التي تابعت من خلالها أحداث الثورة هي:
الجزيرة البى بى سى عربى والعربية أحياناً كلهم عن طريق البث الحى على الانترنت معظم الوقت علشان ظروف شغلى.

* الجريدة التي كنت تقرأها لتتابع الثورة:
برضة الجزيرة والبى بى سى عربى معظم الوقت عن طريق المواقع الالكترونية بتاعتهم.

* الكاتب المفضل خلال الثورة:
نوارة نجم وهى دايما كانت بتحط لينكات لمقالات بلال فضل.

* المذيع (المذيعة) المفضل خلال الثورة هو:
مكنتش باتفرج على برامج حوارية أخبار بس.

* كلمة تقولها لشهداء وجرحى 25 يناير:
الشهداء مش محتاجين كلمتى والجرحى باقولهم أنكم دفعتوا مع ناس تانية كتير تمن حريتنا وأكيد هم معملوش كده علشان يسمعوا من حد شكر أو مدح بس عموما ربنا يعافى منهم اللى لسه عنده مشاكل مع جروحه وإصاباته لكن أحب أقول كلمة لأهالى الشهداء أقولهم ربنا إن شاء الله يتقبل ولادكم شهدا ويشفعهم فيكم وأقولهم أن محدش يزعل علشان خلف رجالة."والكلام ده سواء كانوا شباب أو بنات"

* متقولش إيه إدتنا مصر وقول حندي إيه لمصر.. عندك حاجة تديها لمصر؟
أكيد أنى أحافظ على اللى وصلنا له وما اساعدش حد على الرشوة أو المحسوبية والواسطة وأحافظ على البلد نضيفة وأعمل كل اللى ربنا يقدرنى علية سواء أتبرع بمال أو وقت أو جهد فى أى مشروع يكون هدفه أن البلد تكون أحسن. أكون قدوة لغيرى بأفعالى مش بكلامى.
أخلف ولاد وأربيهم على الأخلاق الكويسة وتبقى دى أكبر هدية لو كل واحد عملها يبقى بنهدى لمصر جيل جديد يبنيها ويحافظ عليها إن شاء الله.

* من سترشح لرئاسة الجمهورية؟ ولماذا؟
لسه بدرى على الكلام ده لما نشوف المرشحين وبرامجهم الانتخابية ومدى قابليتها للتحقق وكمان نعرف خلفيات كل المرشحين وقتها ممكن نختار إن شاء الله.

* لو أصبحت رئيسا لمصر ما هي أول ثلاث قرارات لك؟
أولاً: حد أدنى وأعلى للأجور وإعادة هيكلة للهيئات والمصالح الحكومية بالكامل.
ثانياً: قرارات خاصة بتحقيق إكتفاء ذاتى من الغذاء والسلع الأساسية على مدى قريب وخطوات للنهوض بالصناعة والزراعة والنهوض بالصناعات المحلية اللى لينا فيها ميزات تنافسية عالمية زى القطن وصناعة المنسوجات مثلاً.
ثالثاُ: قرارات خاصة بتحسين التعليم والخدمات الصحية، والتأمين الصحى والتعليم الإجبارى لكل مواطن مصرى وتطوير العشوائيات وحل لموضوع الناس اللى مالهمش أى دخل وده كله بحلول وبدائل بعيدة عن الاقتراض.
وده يلزمه هيئة كاملة من المستشارين الاقتصاديين والاجتماعيين والمتخصصين فى الطب والهندسة والزراعة والتعليم وكافة المجالات.

* لو أعطوك نصيبك من المليارات المسروقه, ماذا تتوقع أن يكون نصيبك منها و ماذا ستفعل بهذا المال؟
ههههههه أكيد مفيش كلام من ده لكن أتمنى الفلوس دى ترجع بأسرع وقت وتدخل مباشرة فى مشروعات تنمية وسداد الدين الداخلى او الخارجى لأن كل يوم بيمر بنتحمل بأعباء ديون أكتر لأن الفايدة على الديون عادة مركبة يعنى بنبقى مطالبين ندفع فايدة على أصل المبلغ وعلى الفايدة كمان  فالفلوس دى ممكن تحل مشاكل كتير وأى مبالغ يتم ضخها فى السوق بتساوى مشاريع يعنى فرص عمل جديدة يعنى حل لمشاكل كتييير.

على فكرة التاج ده عاوز حكى كتير علشان مينفعش بوست واحد نقول فيه كل اللى أحنا عاوزينه 

8 comments:

ليلى الصباحى.. lolocat said...

السلام عليكم

ماشاء الله رائعة اجاباتك اخى الفاضل
بس اعتقد ان كلنا اتفقنا لو كنت رئيس هتعمل ايه وايه قراراتك الاولى ان نحسن الاجور واضح جدا ان المشكلة كلنا حاسين بيها وبنعانى منها (( الحالة الاقتصادية))


بوست جميل و جهد طيب اخى العزيز
ومثل ما قلت يحتاج كلام كتير وياريت نكتب فيه تانى كلنا بشكل مختلف

جزاك الله خيرا
دمت بود ولك تحياتى

Unknown said...

السلام عليكم ورحمة الله وبركاته
أكيد نحن جميعاً لم نكن نتخيل أن يحدث ماحدث وبهذه السرعة المذهلة لقد اتضح أن النظام كان مثل بيوت العنكبوت وليس هذا تقليلاً من عظمة دور وتضحيات شباب الثورة.....

نسأل الله تعالى يحفظ مصر وثورتها وشبابها من كل سوء
اللهم ىمين
وأشكرلك اخى على النموذج الطيب الذى قدمته خلال اجاباتك القيمة
تقديرى واحترامى
وبارك الله فيك وأعزك

Anonymous said...

السلام عليكم ورحمه الله وبركاته
كلفنى الاستاذ بيرم المصرى بارسال هذه التحيه لجميع الاصدقاء وذلك لتعذر قيامه بها بشخصه
(اجمل التهانى واطيب الامانى للجميع بمناسبه عيد القيامه المجيد وشم النسيم)

ورد الغصون...

نيابه عن بيرم المصرى

Unknown said...

الحسيني آسفه اني اتأخرت بس انت أكيد هتعذرني مش كده:)
أنا عارفه انك مسافر لكن كان لازم أمررلك التاج عشان أنا عارفه انك أكثر وطنيه من ناس كتير في مصر حضروا الثوره و كان دورهم سلبي للغايه.
سعيده جداً باجاباتك الواعيه و ده المتوقع من انسان مثقف و خايف على بلده مثلك.
تحياتي و تقديري لك أخي العزيز

الحسينى said...

@ أم هريرة
جزانا وإياكى
أشكرك على متابعتك وتعليقك وأكيد أسوأ ما أفرز النظام السابق هو تردى الحالة الإقتصادية لأنها مع الجهل والمرض بتمثل أضلاع مثلث المشاكل وكلهم ناتج من الأخر ومسبب له فى نفس الوقت.
لك تحياتى.

الحسينى said...

@ محمد الجرايحى
اللهم أمين.
أشكرك أخى على الزيارة والمتابعة وطبعاً ملاحظتك فى محلها فقد كان النظام أكثر هشاشة مما نتصور خالص تقديرى وتقبل تحياتى.

الحسينى said...

@ غير معروف
تحياتى لك وللأستاذ بيرم المصرى.

الحسينى said...

@ شيرين
متأخرتيش ولا حاجه وأكيد مقدر مشاغلك ربنا ييسر لك أمورك كلها :)
شكراً على تمرير التاج وشكراً على كلامك الجميل.
تحياتى لك.