Tuesday, December 7, 2010

الشمس فى كبايه




تانى عريس ترفضه الشهر ده أبوها دايماً يقول هى اللى هتتجوز مش أنا حقها تختار اللى هتعيش معاه أنا مقدرش أغصبها بس دايما كانت بتشوف الحزن فى عينه بعد كل عريس ترفضه عارفه أنه نفسه يجوزها أو يسترها زى ما دايماً بيقول.



اللى كانت مستغربه له إن أمها مش بتعترض يعنى كانت تستنى لما تشوف العريس وبعدين تسألها على رأيها ولما ترفضه كانت بتحس من عين أمها أنها أرتاحت عشان هى رفضته.



دخلت على أمها فى البلكونه وهى قاعده بتشرب شاى العصارى وأبوها كان دخل يقيل فى أوضته قالت لها عاوزه أكلمك فى موضوع, قالت لها سامعاكى.



أتلجلجت شويه وبعدين قالتلها حسام زميلى فى الشغل عاوز يجى يقابل بابا بكره .



أمها ابتسمت وقالتلها هو اللى مخليكى ترفضى العرسان؟



أتكسفت وحطت وشها فى الأرض أمها قالتلها تعالى أقعدى جنبى هاقولك كلمتين.



قعدت جنبها واستنت, أمها خلصت الشاى وقالتلها عارفه كل العرسان اللى اتقدمولك دول, ولا واحد فيهم حسيت أنه هياخد باله منك أوعى يكون حسام ده زيهم.



قالتلها لا يا ماما حسام ده شاب جدع بجد راجل وبيخاف عليا عشان كده أول ما فاتحنى قاللى أنه عاوز يجى البيت.



قالتلها يقدر يجيب لك الشمس فى كبايه؟



أستغربت قوى وبصت لأمها.



أمها قالت لها وأنا بنت أربعتاشر كانوا الخطاب مبيبطلوش خبط على بابنا قامت أمى اللى هى جدتك حكيتلى حكاية قالتلى أن لما جدك أتقدم لها شرطت عليه يجيب لها الشمس فى كبايه قام خرج من غير كلام مد أيده للشمس أتفتفتت فى أيده أصل الدنيا كانت شتا والشمس باهته استنى تانى يوم وخرج فى عز الأياله برضه لقى الشمس يمسكها تتذر فى أيديه قام شد الرحال على الصعيد هناك الشمس حامية وعدت عشر ايام وتسع ليالى ورجع بالزفة والطبل والزمر وجايب معاه الشمس فى كبايه.



لما جدتك حكيتلى على الحكايه كان وقتها أبوكى بيبص عليا فى الروحه والجايه كان موظف أد الدنيا وكل البنات عينها عليه وهو كانت عينه عليا بس أنا مكنتش باديله ريق ماهو الواحدة لازم تتعزز, لحد ما فى مره قابلنى على ناصية شارعنا وقاللى أنا عاوز أزوركم فى البيت يومها قلت له من غير كسوف عاوزنى يبقى تجيب لى الشمس فى كبايه.



غاب يومين ودخل علينا اليوم التالت ومعاه فى أيديه اليمين مهرى وفى أيديه الشمال الشمس فى كبايه.



تعرفى أننا كنا فى أغسطس فى عز الصيف وعين الشمس حمرا موهوجه أبوكى سهر يومين يفكر وتالت يوم قام من الفجريه أستنى الشمس تطلع وراح ساحبها من خيوطها بس الشمس عفيه قعد يشد فيها وهى تعافر قاللى أنها كانت عامله زى المهره الحرنانه بس برضه مسابهاش حتى بعد ما شعوطت أيديه وعلى العصريه كان حطها فى الكبايه ودخل علينا وطلبنى.



الراجل اللى يحب واحدة يجيبلها الشمس فى كبايه.



بعد ما سمعت الحكايه قامت دخلت أوضتها وقفلت على نفسها فضلت سهرانة طول الليل تفكر ولما طلع النهار قامت وجهزت نفسها, على المغربيه جه حسام وأمه قعدوا فى الصالون وبعد ما خدوا واجبهم أمه قالت أبنى عاوز بنتكم ومستعد لكل اللى تطلبوه حسام بص لها وقال ومتشيلوش هم أى حاجه المهر والشبكه اللى تأمروا بيه.



بصت لأمها ومالت عليه وقالت له بشويش أنا مش هأتقل عليك أنا مهرى أنك تجيب لى الشمس فى كبايه.

تمت

الحكاية بدأت هنا http://zainabmagdy.blogspot.com/2010/11/blog-post_12.html

15 comments:

Dr/ walaa salah said...

القصه جميله اوي يا حسيني
اللي بيحب حد يقدر يجيبله الدنيا كلها مش الشمس بس

والقصه اللي في الرابط رووعه

الام تقدر على اي شئ طالما انها بتسعى لحب ولادها

مشكور الحسيني على القصه

Unknown said...

تعرف يا حسيني اني طول عمري كان نفسي أطلب من اللي يتقدملي يجبلي القمر مش عارفه ليه بس هي طلبت معايا كده:)
هو صحيح في الأول ماجبليش القمر بس بعد كده جابلي قمرين (آمن و جوري):))
القصه رائعه و أكتر و ذوقك رفيع و فكرك راقي
تحياتي الخالصه لك

ليلى الصباحى.. lolocat said...

السلام عليكم ورحمة الله

استمتعت كتيييييييير بقصتك واشكرك هلى رابط (خلخال)

قصة كلها ابعاد ومعانى جميلة وطريقة عرضك لها ممتعة جدا جدا

اشكرك اخى الكريم
الحب عطاء وتضحيات وتفانى
يمكن انت فكرتنى بالأية الكريمة ( ولهن مثل الذى عليهن بالمعروف)
دائما اسأل نفسى ليه ربنا سبحانه وتعالى قال فى الاول (لهن )
اقولك سر عن النساء بس ماتقولشس لحد حالص ههههه المرأة على حسب اختلافات طبعها من واحدة لاخرى بيكون لها مطالب واعظمها المرأة الرومانسية بتكون طلبتها بسيطة من وجهة نظرها هى لكن ساعات بتكون صعبة اوى اوى على الرجل فى هذا الزمان .... بتتلخص فى كلمة واحدة ((( أحتواء )))) لو حصل ده بتكون المرأة ساعتها عنده استعداد تجعل زوجها حبيبها ((تاج على راسها )) وممكن اوقات بقدر ماهى رومانسية ممكن تتحول وحش كاسر يدافع عن بيتها وزوجها وقت اللزوم

حقيقى كنت سعيدة بكلماتك راائعة واسلوبك (( عميق ))

تحيااااتى لك

الحسينى said...

@ dr/walaa salah
فعلاً يا دكتورة لأن اللى يحب حد بيكون عنده رغبه فى اسعاده بأى شكل حتى لو كان عن طريق تحقيق طلب يبدو مستحيل
والقصه اللى فى الرابط هى اللى خلتنى أكتب القصه دى
شكراً لزيارتك وتعليقك اللى دايماً بينور البوست

الحسينى said...

@ شيرين سامى
:) بيتهيألى أمن وجورى أغلى من القمر ربنا يباركلك فيهم
وزى ما قلت لك قبل كده التدوينة بتاعتى بتفضل ناقصة لحد ما تعلقى عليها
تحياتى لك وللأقمار الصغيرة

الحسينى said...

@ أم هريرة
سعيد أن القصة عجبتك
وبخصوص السر مش هاقول لحد غير لكل اصحابى الرجال بس علشان الفائدة تعم :)
جزاك الله خيراً على المعلومة المهمة دى
زيارتك وتعليقك دائما مصدر سعادة تقبلى تحياتى

WhItE HeArT said...

بجد جميله

فعلا اللي بيحب بجد

يروح يجيب لحبيبته الشمس في كوباية

ولو مقدرش يبأه ميستاهلهاش

تحياتي

Unknown said...

حلوة يا حسيني اوي اوي :)
انا كمان نفسي حد يجيب لي الشمس في كباية :)

الحسينى said...

@ white heart
أكيد عندك حق
تقبل تحياتى

الحسينى said...

@ قهوة بالفانيليا شيماء على
إن شاء الله يجيبلك الشمس والقمر مع بعض وفى مج كمان :)
تقبلى تحياتى

Flutterby said...

قصة جميلة جدا يا حسيني
وفعلا .. اللي عايز شئ او شخص بجد هايعمل كل ما في جهده علشان يحققة او يوصله.

تحياتي الخالصة لك .

!! said...

حلوة كتير القصة وطريقة عرضك عجبتني اكثر
الحب شيء حلو بس للاسف وقتو قصير. انا مابؤمن بالحب اللي بيخليك تجيب او حتى تحاول تجيب الشمس في كباية..
..................

سألتني كيف قضيت العيد, والجواب كتير سهل;انا كنت بالشغل:=) بالصبح اشتغلت ولما رجعت عالبيت كانت العيلة كلها برا وبما اني كنت كتير تعبانة, فكل اللي عملتو هو اني صليت وبعدين نمت

الحسينى said...

@flutterby
متشكر جداً
تقبل تحياتى

الحسينى said...

@ أشياء لا تراها العين
وقت الحب كبير أو قصير بيعتمد على حاجات كتير زى مدى أخلاصنا للى بنحبهم وبيتهيألى اللى وقته قصير ماكانش حب فى الأساس
تقبلى تحياتى ومتتأخريش فى تدويناتك :)

Unknown said...

السلام عليكم ورحمة الله وبركاته
أحيي طرحك الرائع

تقبل مرورى وتقديرى واحترامى
بارك الله فيك واعزك